Առողջության համար վտանգավոր 6 սննդակարգեր /med-practic.com/

Արդյունավետ նիհարելու համար անհրաժեշտ է ճիշտ ու չափավոր սնվել ու ժամանակ հատկացնել ֆիզիկական ակտիվությանը, վստահեցնում են մասնագետները: Իսկ սննդակարգերը ո՛չ միայն երկարաժամկետ արդյունքներ չեն տալիս, այլեւս կարող են լուրջ վնաս հասցնել առողջությանը:

Ստորեւ առողջության համար 6 առավել վտանգավոր սննդակարգերն են:

Մոնոդիետա

Մոնոդիետաների ժամանակ մարդը մի քանի օրվա ընթացքում նույն մթերքն է օգտագործում: Իրականում նման սննդակարգը կարող է ո՛չ միայն խանգարումներ առաջացնել (մարսողական տրակտի աշխատանքի ու նյութափոխանակության խանգարում), այլեւ հոգեբանական անկայունության ու սթրեսների պատճառ դառնալ: Ավելին, մեծ հավանականություն կա, որ սննդակարգն ավարտելուց հետո մարդը պարզապես կսկսի սովորականից շատ ուտել:

Սպիտակուցային սննդակարգ

Ձավարեղենից, բանջարեղենից ու մրգերից հրաժարվելն ու միայն միս ու ձուկ ուտելը ծանրաբեռնում է երիկամները ու հանգեցնում դրանցում քարերի գոյացմանը: Առանց ածխաջրերի մարդու օրգանիզմը չի կարող գոյատեւել, վստահեցնում են փորձագետները: Պատահական չէ, որ Չինաստանում մահվան դատապարտվածներին բացառապես մսով էին կերակրում: Նախկինում մահապատժի նման տեսակն ամենադաժանն էր համարվում:

Հեղուկ սննդակարգ

Այս սննդակարգը ենթադրում է միայն հեղուկ սննդի օգտագործումը: Խնդիրն այն է, որ նման սննդակարգն անուղղելի վնաս է հասցնում մարսողական համակարգին՝ սննդի կտորների բացակայությունը ժամանակի ընթացքում հանգեցնում է նրան, որ աղեստամոքսային տրակտի որոշ բաժիններ ատրոֆիայի են ենթարկվում: Ավելին, եթե նման սննդակարգի ժամանակ հյութեր խմեք (թեկուզ բնական, թարմ քամած) կվնասվեն  աատամները:

Առանց աղի սննդակարգ

Ի սկզբանե այս սննդակարգը նախատեսված էր երիկամների ու ուժեղ այտույցներով ուղեկցվող այլ հիվանդություններով տառապողների համար: Բայց առողջ մարդու համար աղի օգտագործումից հրաժարվելը կարող է օրգանիզմում նատրիումի պակասի պատճառ դառնալ, ինչն իր հերթին կարող է բարձրացնել սրտի ու երիկամների խնդիրների զարգացման վտանգը: Իհարկե անաղ սննդակարգը կնպաստի քաշի արագ կորստին, սակայն միայն իր միզամուղ հատկության շնորհիվ, այսինքն, օրգանիզմից կհեռանա ջուրը, այլ ոչ թե ճարպի պաշարները:

Ճարպի ցածր պարունակությամբ սննդակարգ

Նման սննդակարգը թույլ է տալիս շաբաթական մինչեւ երեք կիլոգրամ նիհարել, բայց դրա հետեւանքները ծայրաստիճան անկանխատեսելի են: Ճարպաթթուները, որոնք մենք ստանում ենք սննդի հետ, նպաստում են բոլոր ճարպալույծ վիտամինների յուրացմանը: Եթե դրանք ամբողջովին բացառենք, ապա, անխուսափելիորեն, ավիտամինոզ կզարգանա, նաեւ խնդիրներ մազերի ու մաշկի հետ: Իսկ եթե ճարպաթթուների քանակը չգերազանցի օրվա սննդի 20 տոկոսը, ապա արագորեն կնվազի «լավ» խոլեսթերինի մակարդակը, որը պաշտպանում է սիրտն ու անոթները:

Շոկոլադե սննդակարգ

Ասում են, իբրեւ, շոկոլադե սննդակարգի միջոցով կարելի է մոտավորապես 2 կգ նիհարել: Այդ սննդակարգին հետեւում են առավելագույնը յոթ օր: Օրական ուտում են մեկ սալիկ դառը շոկոլադ ու անսահմանափակ քանակությամբ սեւ սուրճ խմում: Կողմնակի ազդեցություններն են՝ այրոց, մշտական գլխացավեր, խանգարված դաշտանային ցիկլ ու լիբիդոյի նվազում, չնայած շոկոլադն, ինքնին, համարվում է աֆրոդիզիակ:

Նյութի աղբյուրը՝ www.med-practic.com