Ջրծաղիկ

Ջրծաղիկը վիրուսային վարակիչ հիվանդություն է, որն ուղեկցվում է տենդով, մաշկի ու լորձաթաղանթների վրա փոքր թափանցիկ հեղուկով լցված բշտիկների առաջացումով, չափավոր արտահայտված ընդհանուր ինտոքսիկացիայով:

Ջրծաղիկի վիրուսն ունի բարձր վարակելիություն (90-95%)։ Վարակը տարածվում է օդային ճանապարհով: Ջրծաղկով հիվանդանում են հիմնականում մանկական տարիքում։ Հիվանդների 50%-ը կազմում են 5 – 9 տարեկան երեխաները, ավելի քիչ են հիվանդանում 1 – 4 և 10-ից 14 տարեկանները։ Հիվանդացության 10%-ը բաժին է ընկնում 15 և բարձր տարիքային խմբին։

Գաղտնի շրջանը տևում է 2-3 շաբաթ (առավելագույնը՝ 21 օր, նվազագույնը` 11 օր)։ Այդ ընթացքում ախտանշաններ ի հայտ չեն գալիս։ Ցանն այս հիվանդության ամենաարտահայտված կլինիկական դրսևորումն է։

Հիմնականում հիվանդությունը սկսվում է սուր, ջերմության բարձրացմամբ մինչև 38 – 39 C և ցանավորմամբ։ Ցանը կարող է ի հայտ գալ որովայնի, ոտքերի, ուսերի, գլխի, դեմքի մաշկի վրա: Բշտիկները չորանում են 1-2 օրվա ընթացքում` առաջացնելով տափակ, շագանակագույն կեղևիկներ, որոնք ընկնում են 6-8-րդ օրը և չեն թողնում սպիներ:

Հիվանդությունը կարող է ընթանալ առանց ջերմության բարձրացման, իսկ ավելի ծանր, քիչ հանդիպող ձևի ժամանակ, ջերմությունը կարող է լինել 39 C և բարձր։ Ջերմությունը հաճախ պահպանվում է 3-6 օր։ Իրավիճակի ծանրությունը կախված է ցանավորման աստիճանից` սակավ ցանավորման դեպքում հիվանդությունն ընթանում է թեթև, որքան առատ է ցանավորումը, այնքան ծանր է հիվանդի վիճակը։

Ի՞նչ ուտել ջրծաղիկի ժամանակ

Հիվանդը պետք է սնվի թեթև՝ նախապատվությունը տալով հիմնականում բանջարեղենին: Պատճառն այն է, որ օրգանիզմի ուժը ծախսվի ոչ թե սնունդը մարսելու, այլ վերականգնողական պրոցեսի վրա: Թեթև սնունդը շատ կարևոր է նաև ստամոքսի համար, որը թույլ չի տալիս գռգռել ստամոքսի լորձաթաղանթը (քանզի բշտիկը կարող է հայտվել նաև բերանի և քթի խոռոչում): Ջրշաղիկով հիվանդներին խորհուրդ է տրվում ուտել նաև.

– բանջարեղենային ապուրներ – պարտադիր եփված կաղամբով և ձավարով (կամ այլ տեսակ ձավարեղենով)

– շիլա – վարսակ, բրինձ, ձավար, հնդկաձավար և մաննի

– թեյեր – երիցուկ, անանուխ, մասուր

– հյութեր – բնական քամված բանջարեղենային և մրգային հյութեր (պարտադիր ավելացնելով ջուր)

– բանջարեղեն – դդում, կաղամբ, վարունգ, գազար, սմբուկ և պատիսոն

– մրգեր – բանան, խնձոր, ծիրան և ավոկադո

– յուղազրկված կաթնամթերք առանց փոխարինիչների

– կանաչի – սամիթ, մաղադանոս, սպանախ, նեխուր

Այս մթերքները պատում են բերանի խոռոչի, կերակարփողի և ստամոքսի լորձաթաղանթի պատերը, կանխելով դրանց գռգռումը, ինչը թույլ կտա հեռացնել այտուցվածությունն ու ալերգիկ ռեակցիայի հայտնվելը:

Նյութի աղբյուրը՝ www.edaplus.info