Մի քանի գաղտնիք մթերքները երկար պահպանելու համար

Երբ բացում ենք սառնարանը թարմ մթերք գտնելու ակնկալիքով, փոխարենը տեսնում ենք, որ այն սևացել ու փչացել է: Ի՞նչ անել մթերքների թարմությունը պահպանելու համար: Իմանալով մի քանի գաղտնիք՝ կարող եք երկար օգտվել մթերքներից:

Բանան – Զարմանալի է, բայց փաստ է, որ բանանները պահպանում են իրենց թարմությունը, եթե ծայրերը կապում ենք սննդային պոլիէթիլենային թաղանթով կամ սովորական տոպրակով: Բանանը սկսում է փչանալ հենց այդ հատվածից, եթե այն պաշտպանվի փտումից, ապա բանանները կմնան թարմ ու կպահպանեն իրենց տեսքը:

Հատապտուղներ – Այս դեպքում խոսքը հապալասի և մոշի մասին է: Թարմ պտուղները թրջում ենք սպիտակ գինու քացախի ու ջրի մեջ 1-3 հարաբերությամբ, ապա չորացնում ենք սրբիչով, դնում համապատասխան տուփերի մեջ ու պահում սառնարանում:

Սոխ և սխտոր – Որպեսզի կարողանանք տանը երկար պահպանել սոխն ու սխտորը, մեզ անհրաժեշտ կլինեն թղթե տոպրակներ: Նախ պետք է փոքրիկ անցքեր բացենք տոպրակների վրա, ապա տեղավորենք սոխը կամ սխտորը, ամուր փակենք ու դնենք չոր տեղում:

Նեխուրն ու բրոկոլի – կարելի է պահպանել սառնարանում, եթե այն փաթաթենք փայլաթիթեղի մեջ ու պահենք սառնարանում: Այդպես նրանք զերծ կմնան ավելորդ խոնավությունից ու փչանալուց:

Հացի թարմությունը պահպանելու համար կարող ենք այն փաթաթել պոլիէթիլենային թաղանթի մեջ, ապա պահել սառցախցիկում: Ուտելուց առաջ հանում ենք ու տաքացնում:

Ձիթապտուղը երկար ժամանակ կմնա թարմ, եթե այն պահենք ձիթայուղի կամ բուսայուղի մեջ:

Նյութի աղբյուրը՝ www.cooks.am